[Icelandic] - Jakobsbréfið

Jakobsbréfið hefur verið talið ritað af Jakobi, bróður Drottins (sbr. Júdasarbréfið), sem Páll nefnir einn af máttarstólpum frumsafnaðarins í Jerúsalem í Galatabréfinu 2.9. Hann er einnig nefndur meðal þeirra sem hinn upprisni Kristur vitraðist (1Kor 15.7). Jakobsbréfið er miklu fremur prédikun en bréf og margt í boðskap þess minnir á spekiritin í Gamla testamentinu, t.d. Orðskviðina. Það er safn af spakmælum eða myndum sem segja mikil sannindi á hljóðlátan en sannfærandi hátt. Það sem sagt er um orðið og tunguna bregður t.d. á skarpan hátt upp mynd af vandamálum samfélagsins. „Með tungunni vegsömum við Drottin okkar og föður og með henni formælum við mönnum sem skapaðir eru í líkingu Guðs.“ (3.9)