ಮಧ್ಯಮ ವರ್ಗದ ಶ್ರದ್ಧಾವಂತ ಮುಸ್ಲಿಮ್ ಕುಟುಂಬದ ಯುವಕ ಆರಿಫ್ ಇಟ್ಟುಕೊಳ್ಳುವ ಮಹಾತ್ವಾಕಾಂಕ್ಷೆಯ ಕನಸುಗಳು ಒಂದೊಂದಾಗಿ ಕಮರುತ್ತವೆ. 1980-90ರ ದಶಕದ ಬಿಹಾರಿನ ಅರಾಜಕ ಸಾಮಾಜಿಕ, ರಾಜಕೀಯ ಪ್ರಕ್ಷುಬ್ಧತೆಯಲ್ಲಿ ಆರಿಫ್ ನ ಬದುಕು ಹಾಯಿಹರಿದ ದೋಣಿಯಾಗುತ್ತದೆ. ಸಾಲದು ಎಂದು, ಆಕಸ್ಮಿಕವಾಗಿ ಚುಂಬಕ ಸೌಂದರ್ಯದ, ಅಪ್ಪಟ ಸ್ನೇಹ ಸ್ವಭಾವದ ತನಗಿಂತ ಹದಿನೈದು ವರ್ಷ ದೊಡ್ಡವಳಾದ ವಿವಾಹಿತ, ಹಿಂದು ಮಹಿಳೆ ಸುಮಿತ್ರಾಳ ಮೋಹಪಾಶದಲ್ಲಿ ಸಿಲುಕಿ, ತನ್ನ ಸಾಧನೆಗಳಲ್ಲಿ ಸೋಲುತ್ತಾ ಹೋಗುತ್ತಾನೆ. ಇದು ಒಬ್ಬ ವ್ಯಕ್ತಿಯಾಗಿ ಆರಿಫ್ ನ ಕಥೆಯೂ ಹೌದು, ವಿಶಿಷ್ಟವಾಗಿ ಬಾಬರಿ ಮಸೀದಿ ಧ್ವಂಸ ಪ್ರಕರಣದ ನಂತರದ ಪ್ರಕ್ಷುಬ್ಧ ಭಾರತದಲ್ಲಿ ಒಬ್ಬ ಮುಸ್ಲಿಮ್ ಆಗಿ ನಿಭಾಯಿಸುವ ಯುವಕನ ಕಥೆಯೂ ಹೌದು. ಆ ಕಾರಣಕ್ಕೆ ಆರಿಫ್ ಈ ದೇಶದ ಯುವಜನರ ಪ್ರತೀಕವಾಗಿಬಿಡುತ್ತಾನೆ.